آخر صرخة‎

لعبو بدولتنا  الأقزام
وتركو الساحة فلتاني
وعملو إجرام وإعدام
بحق الشعب اللبناني
__________
بحجة تركيب موازين
وتأمين السلم الأهلي
خطة ما انحط من سنين
وكل لاعب طارق جهلة
صرنا بدولة مديونين
وكل يوم مناكل وهلة
منتفعين ومسؤولين
بيمشو فينا خليفاني
__________
يا فرنساوي اللعبة زين
تعبت ودخت بموطنّا
نحنا القصة فهمانين
ما تصدّق كلمة منّا
نحنا حطّينا قوانين
مش موجودة غير عنّا
مكسورين ومنقسمين
ومنمشي عالعمياني
__________
بدولتنا في مرتكبين
وفي شعب معتر محكوم
بينطرّ تسعير البنزين
أو كيس الرز المدعوم
ومن أموال المودعين
كيف بدّو المدعوم يدوم
الكذّابين الدجّالين
خلّو العالم جوعاني
__________
وفي وعظات رجال الدين
يوم الجمعة ويوم الحَدّ
بيحكو وهنّي منفعلين
وشو لازم يحصل بالغدّ
ليش ما كنتو منتبهين
ومنعتو الهيكل ينهَدّ
عا راس الشعب المسكين
انكان مسلم أو نصراني
__________
عملو الحكّام سلاطين
ونحنا قبالن زقفّنا
وإنتو عملتو ندّابين
والتوب الأسود شفنا
ناس وموتى مدفونين
تحت الأرض وماعرفنا
ليش يموتو مظلومين
ومين المجرم والجاني ؟ !
__________
صرختنا يا مغتربين
ما تنسو الشعب بلبنان
إنتو الإخوة المنتشرين
بكل العالم والبلدان
نحنا عليكم  متكلين
ولبنان مفلّس خربان
وباللبناني مجبورين
يا إخواتي وإخواني
أنطوان إدمون أبوجوده 

مقالات ذات صلة

زر الذهاب إلى الأعلى