أركان الحكم تلاتي‎

أركان الحكم تلاتي
وكل حاكم همّو ذاتي
الماضي ماضي بالتعتير
والأعظم بكرا الآتي
______________
استدعيتو من الخارج حَلّ  
وما كنتو عنّا تحلّو
والشعب اللبناني مَلّ
وما قبلتو المرّ تَحلّو
وبكلّ موقع في محتّل
مش من مقدرتو احتلّو
ويا ريت من السلطة فلّ
ولا يكون حكمو خيالاتي
______________
السلطة التنفيذية جناح
بين الواقع والتشريع
حلم الدولة معها راح
بالإهمال وبالتمّييع
جنيو من الدعم الأرباح
والحجة منع التجويع
ومن فقرو اللبناني صاح
وجروحاتو جروحاتي 
______________
عملو نادي وشخصيّات
فيها وجوه حكومية 
بيجتمعو بكلّ الاوقات
بصيغتها البيروتيّة
بيزيدو الأزمة أزمات
حتى ينالو شعبيّة
دياب وسنيوره بالذات
مع تمّام وميقاتي
______________
وبساحتنا في أقطاب  
بيتبارو ومش متفقين
عاشو بالماضي سرساب
حروب الإخوة ومختلفين
جوقة بتحكي من معراب
وبالشالوحي العونيين
” خيّك أوعا ” وظنّي خاب
من  العوني و القوّاتي
______________
وفي كلمة بيجدلّها جدل
وبيطلع بين الإعلام
ياريت بيبدلها بدل 
ما يشوّه فينا الأحلام
بالقانون بيحدل حدل
وناطق صار بموقع عام
وكلما بيحكي بإسم العدل
بيجرّصنا جريصاتي
______________
لبناني وعايش مقهور
وفي عندي مليون رفيق
ناطر متلي خيط النور
ويصدر بالحكم التحقيق
التدقيق المالي المحظور
بيغفى كل مدّة وبيفيق
وما بيكشف مرّة المستور
بالبحث المعلوماتي
______________
ماروني بوضعي قنعان
وعن شعري وحالي راضي
شاعر وبقلبي إيمان
وبأجمل رفقة حاضي
مش رح خربط بالأوزان
ومش رح أحلم عالفاضي
ولو بطلع ريّس لبنان
مش رح جيب صهوراتي
       أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق