إجرام السلطة !

لبناني وقلبي دامي
وضايع حقّي الإلزامي
محكوم الشعب المسكين
بسيف السلطة الإجرامي
_____________
أقطاب وأصحاب المال
عملو خطّة مشؤومة
وبيعيشو بأحسن أحوال
قبال الناس المحرومة
وبالدولة مش باقي رجال
ولا نوّاب ولا حكومة
صورة بشعة وحكم خيال
هابط إسمو ومش سامي
_____________
حطّو ألغام وأفخاخ
عادروب الحلّ الموعود
والحاكم تفكيرو شاخ
ومش قادر يعطي مجهود
شكلو بقلب الصورة باخ
مش مسؤول ولا موجود
وطبخة بحص بلا طبّاخ
جوع وموت بلا قيامة
_____________
مش مطلوب رجال الدين
يغطّو أغلاط الحكّام
يقولو للشعب المسكين
هلق ثور وهلق نام
كنّا عليهم متكّلين
وعشنا مدة بالأوهام
تعبانين ومقهورين
وموجودين بدوّامة
_____________
بيكفينا قهر وإنكار
من السلطات المسؤولة
نغطّي وما نلاقي أوكار
الهدر بدولة مشلولة
ومين تلاعَب بالدولار
بالأوراق المجهولة
تجّار وحكّام كبّار
عملو القيد الإعدامي
_____________
من جيبَك شيل التكليف
يا سعد ولا تناور بعد
وعالدولة تحطّ مصاريف
التعطيل وما تلاقي بعد
صيغة حلّ وعزم نضيف
نضيف ويصدق مرة الوعد
إنت وجبران مقاديف
للأفكار الهِدّامي
_____________
صرّلك أكتر من جيلين
يا برّي بمجلس نواب
وعلينا بيزيد الدين
ويا محلا لو كنّا بغاب
بتشرّع عقد وعقدين
بتفتح أو بتسكّر باب
ومين قدّك عاش بعصرين
وشعبو ميّت مش نامي
                  أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق