اغفُر لِي وْعَلّمْني إغفُر!

 

 

 

اغفُر لِي وْعَلّمْني إغفُر

يا ربّي وعَلِّمْني توب

الخَطيّه بروحي بْتِحفُر

دهليز مخزّن بذنوب

______________

الخَطِيِّه شَوّهِتْني

يا ربّي وْضَيَّعِتْني

الإبن الضّالِ غْفَرتِلّو

نَظراتَك تَوَّبِتْني!

______________

عا صِدرَك بِسْنُد راسي

يا يَسوع رَبّي الحَنُون

بمَلّي من خَمْرك كاسي

حُبّك لقَلبي.. قانون!

______________

لمّا قَلبي قَلبَك طاع

حَرَّرني مِنِ الضّياع

مِن قَلبَك بِغرُف حُبّي

بْحُبَّك كِلّ شِي مُسْتطاع!

______________

الحَقيقَه ما بتِتْخَبّى

عَ الكَون بنُورا بْتِسْطَع

العَدل بْأحضانا تْرَبّى

والشَّكّ بْسَيْفا بتِقطَع

______________

يا رَبّي إنتَ حِصنِي

برَحمِة قَلبَكْ غَطِّسْني

رَبّي عَمِّدني بْنُورَك

بنِعمِة حُبَّكْ خَصِّصْني

______________

قلبي النّازِف يا يَسوع

بإيمانو فيك بيِشْفى!

حَوِّل لي قَلْبي يُنبوع

للحُبِّ الصّافي الأَوْفى!

______________

مِن دونَك قَلبي بْمَنفَى

لا بيِرتاح وْلا بْيِغفا

رِدّّلّو نَبضِ الحَياة

بْحُبَّك حَياتي بْتِدفا

______________

نَجّيني من التّجارِب

بِسلاحَك رَبّي بحارِب

صَليبَك وَحدُو سْلاحي

عَدُوّي مِنّو هارِب

______________

مِن دُونَك قَلبي يابِس

العَدُوّ أنفاسي حابِس

يا يَسوع بْسلامَك

بْتِحيي لِي وِجّي العابِس

سيمون حبيب صفير

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق