الأفغاني واللبناني‎‎

صار الوضع اللبناني
متل الحال الأفغاني
وصرنا نخاف الحكم يصير
بيشبه حكم الطالباني
_____________
ناس بتوقَف عالطرقات
وبتركض صوب المجهول
فوضى وحروب وضربات
سلطة تقوم وسلطة تزول
والعنف بيربح جولات
وفاتح تمّو متل الغول
بيحصد أرواح وأموات
بين الناس الهرباني
_____________
ونحنا مش أحسن بكتير
وكابول بتسأل بيروت
متلك قضيّت التعتير
ومش باقي سطوح ولا بيوت
ما قدرنا الأزمات ندير
ودفنّا الحل بتابوت
وحكم يغط وحكم يطير
وكلّ الدولة خرباني
_____________
ما قدرنا عملنا إصلاح
ولا هنّي قدرو  عملو
حملنا بوجه البعض سلاح
وهنّي عابعضن حملو
قصصنا للدولة جناح
وما جمعنا الموطن شملو
ولبناني وأفغاني ناح
من الأوضاع الفلتاني
_____________
عملنا دولتنا ساحة
وما قدرنا نعمل قانون
ومنقضّي الوقت نياحة
عالشكل ومش عالمضمون
نحنا الأرزة الفوّاحة
وفينا بأحلى وضع نكون
ومش عالشجرة تفاحة
قبال الجيرة الفجعاني
_____________
الامريكاني وين ما راح
الموت بيمشي عاجنبو
بيعمل صفقة من الأرباح
والشعب الجاهل ذنبو
بيعمل حرب من الأشباح
بيخسر حربَك مش حربو
وبيتأسف عالأرواح
وعامل حالو إنساني
_____________
يا لبناني بشرق وغرب
ما في دولة بتفيدَك
لو تمشي جالس مش ورب
ومع خيّك توضع إيدَك
عملو فينا أبشع ضرب
وغير الله ما في سيدَك
بتقوى بالسلم وعالحرب
بترجع أول مش تاني
أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق