صَوم الحاكم!
منغرق نحنا وما منعوم
ومنجوع ومنضلّ نصوم
وبالصوم الحاكم شبعان
ومن مال السلّطة متخوم
————-
بيعزم عالأكل معازيم
ومن مال الخزنة بيصرُف
مرقّم كل طاولة ترقيم
وعَ أطيب أكل بيشرُف
وتانعمل ورشة ترميم
شي مية دمعة بيذرُف
وبيكرّم حالو تكريم
وعا كتافو بيحطّ نجوم
————
عايش من كتر التشبيح
عَ الأملاك البحرية
ونحنا الراتب عنّا شحيح
ومنقبض عاليومية
وكيف بدّو من السلّطة يزيح
وفيها نعمة مخفيّة
وكل ساعة بيعمل تصريح
ومفكّر حالو مهضوم
————-
يا ملمّع وجّك تلميع
وحاطط صبغة فوق الشَعر
عم تنسى هموم التشريع
ونازل فينا صوب القَعر
وحدّك بتمشي مصاريع
ونحنا منمشي بقلب الوَعر
ومرفَّع حالك ترفيع
وما في غير الله بيدوم
أنطوان إدمون أبوجوده
