الشعب المظلوم‎‎!

ما تصدّق مجلس نواب
ولا حكومة ان جابو  سلفه
كيف ما حسبنا وعملو حساب
بتطلَع عالناس الكلفة
_______________
حكومة ميقاتي بكير
شالت دعم المحروقات
لا فينا بسيارة نسير
أو حتى بالتاكسيّات
فوضى وعجقة وزمامير
وناس تعمشق عالباصات
واكتر من أول بكتير
بالتسعيرة في شَلفة
_______________
بخبز  الأبيض ما منشوف
سعر الربطة وكم غرام
والوزن الفعلي محذوف
 وبيمحّو طبع الأرقام
والتعميم بيبقى حروف
بيصدر كرمال الإعلام
ومسؤول الدولة معروف
بيهرب من بابو الخلفي
_______________
يا حكّام بقيتو سنين
تحكو عن دعم وإصلاح
ومن أموال المقهورين
 بالغش جنيتو أرباح
عملتو بالعنف سلاطين
وقتلتو ناس وأرواح
ومن خبز الشعب المسكين
شبعتو وعملتو علفة
_______________
كل شخص بدَخلو محدود
ما بياكل لحم ولا دجاج
والدعم المالي مفقود
وصاير مقهور ومحتاج
وبدولتنا عنّا عهود
وأفواج بتخلف أفواج
والجيل التاني موعود
والله يلعن هالخلفي
_______________
وبعد منحكي بالألقاب
دولة وريّس ومعالي
شاب اللبناني وما تاب
ولو صفّى بأصعب حالة
الميقاتي عالساحة جاب
وفي موقع عالي خالي
منهرب من تحت المزراب
ومنوقف تحت الدلفة
_______________
وبالآخر يا شعبي فوق
ولا تشحد من غيرك حَلّ
بالعالم إنت المرموق
وليش بأرضك عم تنزلّ
الحلم اللبناني مسروق
والجاني بعدو ما كَلّ
نحنا مش ساحة ولا سوق
للغير بيعمل كلفة.
أنطوان إدمون أبوجوده

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق