القضاء والقدر !

حطّينا أصول التشريع
ونحنا ما منراعي أصول
وقاضي بيرفض أمر يطيع
من مجلس أعلى مسؤول
___________
نسينا وضع التشكيلات
وحطّيناها بالجارور
ومنفتّش عن توليفات
مش موجودة بالدستور
منعمل بالغير نكايات
ومندافع عن واقع زور
ومنتمرجل بالساحات
وشو ما بدنا صرنا نقول
___________
عملو بالسرّ سحوبات
مش منظورة ومخفيّة
للخارج بالتحويلات
والأسماء الوهميّة
وشنطة بتشحن دولارات
بظل الأزمة النقديّة
وبيطيرو بالطيارات
والرقم الفعلي مجهول
___________
قولو مين الشخصيّات
عملت تهريب وتزوير
وما في بالعالم أزمات
ممكن أسوأ منها يصير
الداتا محجوبة بالذات
حتى ما يصير التغيير
ونبقى بورطة وسياسات
ما بيتلاقى معها حلول
___________
كنّا ناخد تطمينات
والمال الأخضر مشحون
وما خلّو غير الليرات
لعم تنهار بشكل جنون
والبنك يحط حجوزات
ويلاحق شو عندو ديون
وما بيعطي الناس حسابات
والباب مسكّر عاطول
___________
تحرّك يا قاضي عويدات
وطبّق ببلادي القانون
الأفضل تعمل توقيفات
مين ما كان الشخص يكون
ضعنا بأمر التشريعات
ومين الأعلى ومين الدون
ومين بيمنع تحقيقات
بالممنوع وبالمقبول
___________
بآخر فترة بالساحات
صرنا نقشع غادة عون
تحكي وتعمل تصريحات
مرة هون ومرة هون
وبتظهر متل النجمات
وشعبيّة بتطلب والعون
وبتخلع باب وغالات
بعوكر بتصول وبتجول .
أنطوان إدمون أبوجوده

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق