بإنجيلَك عَم تِحكِيني‎

✝ بإيماني بْحَرّك تِحريك
الإيد لّي بتصنَع آيات
بمشروع الله صِرت شريك
كِلماتُو بْرُوحي غايات
___________
✝ التِّمجيد لإسْمَك بيلِيق
يا ربّي رَبّ الأرباب
بإيمانِي بْحَلّق تِحلِيق
البَشَر بِقَلْبِي الأحباب
___________
✝ رَبّي بارِك لِي الوَزنات
تا إستَثْمِرها بْحَقلَك
بْتِزرَعلَك رُوحي جنَينات
تا تصير حِلْوِه وتِلبقْ لَك
___________
✝ ساعِدني حَتّى جاهِد
يا ربِّي وإبْقى شاهِد
شاهِد على القِيامِه
ومَجدَك بِقَلْبي زاهِد
___________
✝ بإنجيلَك عَم تِحكِيني
وأنا بصَلاتي بِحكِيك
يا عَدرا شارِكيني
بْحُبِّي لّي بَلاكي رْكِيك!
___________
✝ عطِينِي يا رَبِّي يَسوع
مِن عُود صَليبَك نَسْرَه
قَلبِي الخافِق بَين ضْلُوع
حُبَّك مَحّالُو الحَسْره
___________
✝ عَلِّمْني إرحَم يا ربّ
رحَمْني يا بَيِّ الرَّحمِه
عَدُوّ النّعمِه خَرَّب
وبِالنِّعمِه عْمِلْتُو فَحمِه
___________
✝ عَلى حالِي طَمّنّي
رَبّي.. وفَرِّغْنِي مِنّي
رَبّي مَلّينِي مِنَّك
بْشِركِة حُبَّك أمِّنّي
سيمون حبيب صفير

مقالات ذات صلة

زر الذهاب إلى الأعلى