جنس المسؤول العاطل‎‎

شعبك يا موطنّا طَقّ
وباب المحنة الأسوأ دقّ
ومش ممكن يبقى المسؤول
يحكي ويسكت صوت الحقّ

_______________

هندسة الدعم الموعود
بدعة جديدة مطروحة
حتى هدر جديد يعود
وما نرجع للبحبوحة
وعن مال الناس المفقود
بجيبة دولة مقدوحة
بيحكي المسؤول وبيجود
وشاطر بالكذب وبالنَقّ

_______________

رجالات الدولة أجناس
والجنس الأكتر عاطل
عبّو الثروة كياس كياس
مش بالحقّ من الباطل
بكل كلمة بيهين الناس
وما بيعرف غير يماطل
ثقيل الدم وفاضي الراس
ومافي مرّة حنّ ورقّ

_______________

ثورتنا ثورة أطفال
فيها كتار الجوعانين
ثورتنا ثورة أبطال
مش أزلام ومنتفعين
لازم تبكو عا أفعال
فيها تحايلتو من سنين
عملتو دولة بلا أوصال
صف الوحدة فيها انشق

_______________

سخّرتو حكم القانون
حتى من العدل تنالو
وما في عاقل أو مجنون
ما بيبكي  عَ أحوالو
كل حاكم فيكم ملعون
بماضي وحاضر أفعالو
لا مهضوم ولا موزون
وفعل العاطل منو اشتقّ

_______________

منكم ما بدنا تشكيل
سلطة جديدة وحكومة
نرجع ونلاقي التعطيل
بالجلسات المشؤومة
بيكفي شو لقينا تنكيل
حتى تصيرو منظومة
تتمقطع من جيل لجيل
بلعبة موت وأبشع دَقّ

_______________

تعودنا نعيش الأزمات
وأنتو جعلتوها بلا حلول
وتغيبو بأصعب أوقات
وياريت تفلّو عاطول
وبين زيارة وزيارات
عيشتونا بالمجهول
تروحو وتجيبو صفقات
وزقّ تزقو السرقة زَقّ

أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق