حرب الشوارع‎

لازم للسلّم نسَارع
وما نعود كتير نشارع
مسؤول بيهجي مسؤول
وشارع بيحارب شارع
_____________
هندسة الحل الموعود
ضايع ما بين الأقطاب
والعقل الواعي مفقود
وفينا ظن العالم خاب
وعاجلساتو لو بيعود
ما بينفع مجلس نوّاب
لا بيهتمّ ولا موجود
وحاكم حاكم بيصارع
_____________
عملوها حفلة تنكيت
والعالم ضحكو علينا
وهالجلسة بأصعب توقيت
شفناها وما اهتمينا
وحطّو الأزمة بتوابيت
تقاتلنا وما تعزّينا
من تعطيل ومن تفتيت
وكل نايب فتنة زارع
_____________
شوّهتو ليل الأحلام
وصارت عنّا العتمة ضيف
والأنوار من الأوهام
بالشتويّة وفصل الصيف
كيف بدنا نمشي لقدام
وصار الفقر علينا سيف
والحاكم عالكرسي نام
وبيفكر حالو بارع
_____________
 رحنا بكل الأرض نجول
حتى العالم  يعطينا
والخارج عنا مشغول
ومش همو يفكر فينا
و عم  يرفع  سيفو المسلول
تايعاقبنا  و يلّوينا
وما في بالدولة مسؤول
الحجّة بالحجّة يقارع
_____________
يا برّي عالجلسة فوت
ولا تتشاجر مع جبران
ببلادي مش باقي بيوت
إلّا وما فيها جوعان
الشعب اللبناني مكبوت
وتحت الجمرة في نيران
بدها خبز وبدها قوت
مش دولة متل مزارع
_____________
يا ريّس وين صار العهد
وبأيا خطة مشينا
وين الدعم وين الجهد
والأسوأ نحنا بقينا
بين اللحد وبين المهد
خلفَك بالماضي مشينا
شربنا المرّ وكاس العهد
الشعب اللبناني كارع
   أنطوان إدمون أبوجوده

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق