حكومتنا مش تكنوقراط‎‎

عاش بدولتنا الإحباط
سرقة وفوضى وجوّ عياط
لا خطة جديدة ولا حلّ
ولا حكومة من تكنوقراط
_____________
جابو الميقاتي من جديد
يشكّل بالصورة حكومة
يمكن ذات الأزمة يعيد
بتركيبة مش مفهومة
حطّو للحلّ مواعيد
وما منصدق منظومة
بتعمل فينا شو بتريد
وخسرنا معها أشواط
_____________
رجعنا نشاهد بو فاعور
بيحكي وكلمة ما بيسمع
وما سمعنا مرّة تيمور
بيحكي أو نجمو بيلمع
الشعب اللبناني مكسور
والحاكم ثروة بيجمَع
وبين الشاطر والمشطور
نحنا منعلق بالأوساط
_____________
الشارع شارع مقهورين
وأزمتنا أزمة حكّام
كانو علينا متفقين
وعطيونا جرعة أوهام
ياما وياما مرتكبين
من أهمال ومن إجرام
وبكل صفقة خيّاطين
وقطبة مخفيّة وخيّاط
_____________
البنك الدولي مش مجبور
يعطي دولتنا الأموال
والحاكم عنّا مغرور
وعايش عيشة عال العال
ميقاتي بمالو مشهور
وعامل صفقات وأعمال
انشالله نحنا بعد شهور
ما نوفي عنّو الأقساط
_____________
ما قدرنا نكشف أسرار
وعتمّتو علينا الطاقة
عشنا الظلمة ليل نهار
بظل الدولة السرّاقة
تيّار السلطة الطيّار
طاير من طاقة لطاقة
غراب البين وموت وعار
وما ناخد عا وعودو رباط
_____________
بمصرف لبنان القانون
مش بالنقد وبالتسليف
وحاكم ليرتنا بيخون
وبيعرف يعمِل تحريف
ما بيعطي الحلّ الموزون
وبيحطّ العجز مصاريف
لمّا بإيد السطلة يكون
يلاقي أعراف وأنماط
     أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق