حكّام الدولة مجانين‎

استهترّتو فينا من سنين
وعن شو صاير مسؤولين
أنتو مش حكّام بعقل
أنتو بالسلطة مجانين
………..
كتبتو التاريخ المشؤوم
بالعيب وسوء الأحوال
وكل واحد فيكم مغروم
بالجاه وتجميع المال
بالمجهول وبالمعلوم
أنتو مصيبة ، مين لقال
حكم الظالم بدّو يدوم
ونحنا منبقى المحكومين
………..
تشكيل حكومة من شهور
توقعّنا وما طلعت بعد
وكل حاكم حاكم بالزور
لمّا بيخالف بالوعد
جبران بحالو مغرور
ومتلو شايف حالو سعد
وعلينا الأزمة بتدور
وعا حساب الشعب المسكين
………..
مش باقي غرفة ولا سرير
ولا مستشفى عليها نفوت
وكل يوم بيصدر تدبير
من السلطة نلازم البيوت
مش محضر ضبط وتسطير
بيمنَع شعب بلادي يموت
العلّة من مسؤول كبير
لا ذمة عندو ولا دين
………..
كيف قللّ عقلو ماكرون
وصدّقكم لمّا قلتو
علينا يا ريّس بتمون
والعكس رجعتو عملتو
كل حاكم عنّا ملعون
وعالسلطة كيف حصلتو
وعالدولة حطّيتو ديون
وبالغش سرقتو ملايين
………..
وبعدو عايش حلم القصر
عند الأقطاب بلبنان
ورفعتو رايات النصر
وأهداف حقوق الإنسان
وأنتو عصرتو العالم عصر
ولبسّتو لولو ومرجان
وأجمل نكتة بأسوأ عصر
تهريب ودعم البنزين.
أنطوان إدمون أبوجوده

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق