دعم المفقود‎‎

كل شي صاير بالتقنين
وما عنّا للفوضى حدود
منصرف عالدعم ملايين
وبنج المستشفى مفقود
________________
بدولتنا زادو التجار
وبالساحة كترو الباعة
وسياسي بيعمل سمسار
وللغير مقدم طاعة
ولا مازوت ولا تيّار
وكهربة الشركة ساعة
مناكل ومنشرب أعذار
ومنجمَع بالوهم سدود
________________
ياربّ العيلة المحتار
كيف بتربي أولادَك
في الله العالي ستّار
بيرجع ينظر عابلادك
وحاكم مصرفنا بدولار
بيلعَب وبيقطع زادك
وصعبة يتقاعد شي نهار
بيكبَر بالسن وبيعود
________________
ليليّة منسمَع أخبار
حتى نعرف شو صاير
منبكي عاواقع منهار
كيف سعر السلعة طاير
ولبناني بفقرو جبّار
ما بيركع أو بيساير
وبأوضاعو شو ما صار
غير من الله مش مسنود
________________
مش لازم نلعب بالنار
ونعمل فتنة شعبيّة
نحنا أخوان وأحرار
وضدّ الحرب الأهليّة
ومنوقف بين الأخطار
نصدّ الأطماع سويّة
وما منرضى يصيرو الأشرار
بين الأهل يخونو عهود
________________
منرجع ومنسأل شو صار
بتشكيلة مش عم تزبَط
بقلب الأزمة والأسعار
 بحالو اللبناني تخبَّط
والحكم بيخفي أسرار
والحل الآتي أحبَط
بالأطماع وبالأفكار
صرتو بقتل الناس شهود
________________
بكل أزمة عملتو أزمات
بين الشاري والبايع
وبالمال زرعتو سياسات
وحق اللبناني ضايع
بالغش عملتو سرقات
وما سمعتو الطفل الجايع
بين عطيني وخود وهات
” الله يديم ويحمي عهود “
أنطوان إدمون أبوجوده  

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق