دولة فساد!

 

 

يا سياسي بلادنا المجنون            شو باك فينا بتاخد وبتجيب

ماكنت مرة بهالوطن موزون        وفيك الامل والظنّ عم  بيخيب

بتصنع الازمة والظرف مشحون    وتارك الكرسي بالرئاسة تسيب

وبتزيد بحساب الخزينة ديون        وخيراتنا بتترك بلا تنقيب

فاتح على  صرف النفوذ عيون      وكيف ما الأيد ضربتها بتصيب

وبتجيب النا الفقر لما تكون          فاتح على حساباتك  مزاريب

فيك ياما مقدمين طعون              وأسمك تشطب بالأصل تشطيب

وتمثيل شعبك كنت عم بتخون        كلما طلبنا منك مطاليب

وأبنك البكر الأرعنّ الملعون          بدك علينا تنصبو تنصيب

وبتعلمو يعمل علينا فنون              وضروب يضرب بهورة وتنصيب

وبتجيب ألنا بكل فترة زبون         متلك بلا منطق بلا تهذيبب

منو العمولة بتقبض وبتمون          ع مناقصات بتربح بتسريب

بتحط  كسّارة عا مجرى عيون       بترغيب أو بالعنف والترهيب

ومحفرّ رمل ياكل جبل وحصون      بلمحة بصر أكبر جبل بيغيب

نحنا شعب ما بيفرح  ومحزون       تعوّد على التنكيل والتعذيب

طقم السياسي بالطمع مسكون          نحنا ما فينا غيرطقم نجيب

كل همّو  يقعد بصالون                 ويدرس أمور السمسرة بترتيب

ويضل للخارج قصد مرهون         ياخد منافع والمناخ يطيب

نحنا ما عنّا دولة القانون              عنّا جماعة خاطفين الناس

  بدولة فساد ودولة محاسيب …

أنطوان ادمون ابوجوده

مقالات ذات صلة

زر الذهاب إلى الأعلى