دولة مقطوعة‎‎

أزمة حكم ومحتكرين
وأطفال تعيش بلا قوت
وناس بتصرخ موجوعين
وعابواب المستشفى تموت
________________
مسَكِّن مش باقي وأمصَال
صارت عآخر نقطة
ما في رجال ولا عقّال
تاينجونا من السقطة
وحتى نحاسب عالأفعال
والمجرم نلقط لقطة
نعيد ونسترجع أموال
من حكّام الدولة الخوت
________________
بالتهريب وبالتخزين
صرنا بدولة مقطوعة
دفعنا عالدعم ملايين
وكلّ المرضى موجوعة
منسمَع أخبار البنزين
وكم سيارة مقطوعة
وطوابير ومصطفين
وبالعجقة تسكّر بيروت
________________
حكومتنا بين أخد وردّ
صارت قصة وهميّة
ساعة اليوم وساعة الغدّ
التشكيلة الميقاتيّة
وعون بيعمل حدّ وسدّ
وبدو من الميّة ميّة
وهالواقع عالناس ارتدّ
جوع وفقر وقهر بيوت
________________
تحاصرنا من الامريكان
وماكرون علينا عاتب
ضيّعنا حقوق الإنسان
وما بيكفي نهار الراتب
منشحد نفط من البلدان
وصرنا في أدنى مراتب
والوضع الأمني فلتان
وسلاح الدولة مكبوت
________________
خزان الأزمة بيفيض
ورجال الدين بتحكي
ما بينفَع شغل التبييض
وللشاكي نرجع نشكي
وللفوضى نعمل ترويض
مابدنا نهب وننكي
وكل ما بتحكو بالتحريض
ألأفضل لو تعطونا سكوت
________________
دمّ اللبناني لو سال
ما بيهتمّو المسؤولين
شلّو بكل بقعة الأعمال
مكروهين ومنبوذين
الله ما بينسى الأفعال
وقديش صارو مرتكبين
وكل ظالم لو عمرو طال
رح يرجع عالقبر يفوت
أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق