ديك الثّوره

سْمِعنا ديك الثَّورَه صاح

صَحّانا صَحوِة ضَمير

وَطنّا بدّو إصلاح

وْنَفضَة وْصِيانِه وْتِعمير

___________

 

مْنصرُخ بِالصَّوت العالي:

مَصدَر السُّلطَه نِحنا

لبنان أغلى مْنِ الغالي

بْقَلبِ الأرزِه مَطرَحنا

___________

 

إنتُو الفاسدين التّافهين

لْ خرَّبتو وطن الأرز

إنتُو البِشْعين الشِّرهين

وتجّار الفِتنه والفَرز

___________

 

ريحِتكُن بِتقَرِّفنا

شَوَّهْتُو صُورِة لبنان

ثَورِتنا بِتْشَرِّفنا

وِبْتَعطي مَوسَم حِرزان

___________

 

رَح نِشحَطكُن عن الِعرُوش

إنتُو عِصابِة الِكروش

نهَبْتُو سْرَقتُو مال الشَّعب

ثَورِتنا إلكُن قاشُوش

___________

 

يا فاسِد خايِن شَعبَك

الحَبس مْشَرَّع لَك بابُو

مْوَطّا راسَك لَكَعبَك

وْشَعبِي رهَنْتِلُّو تيابُو

___________

 

عَلى ألله مِتّكْلِين

وْمِنريد لّي بيريدُو

بْتاجِ المَجْدِ مْكَلَّلين

لْ مِن ايدُو ألله يْزيدُو

___________

سيمون حبيب صفير

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق