سحب التكليف‎

حكومتنا رهن التوقيف
لا أعمال ولا تصريف
وما بيقدر مجلس نوّاب
يسحب من سعد التكليف
___________
ما عنّا بحكم الدستور
نرجع ناخد شو عطينا
ويمكن يبقو بعد شهور
وأكتر يتسلّو فينا
ونحنا منشهد يمكن زور
لولا سكتنا ورضينا
ولازم نرجع ثورة نثور
نمشي وما نكون خواريف
___________
تفضل يا حسّان دياب
كفّي وما تهمل شغلك
وعالأعمال تسكرّ باب
ولا تتصرف عامهلك
مش شايف موطنّا ساب
من جهل الحكم وجهلك
وبالدولة فلتاني دياب
وعالقصر مشرِّف تشريف
___________
وفي سَعد بيبكي وبينوح
بجولاتو المكوكيّة
بيشرّف يوم وبيروح
عالبلدان الغربيّة
بيحكي وبيعطينا شروح
عن تشكيلة وهميّة
وبين الزائد والمطروح
في زيادة كذب وتسويف
___________
أزمتنا أزمة حكّام
وناس بترضى بالموجود
وسياسة سرقة وأزلام
والسلم الأهلي مفقود
عشنا بالماضي أوهام
وخايف صوب الماضي نعود
نلاقي وما نشيل الألغام
ونعمل للفتنة توظيف
___________
صرنا شحّادين الحلّ
بين دولة وتاني دولة
وميزان التحكيم اختلّ
 بين الجولة والجولة
لعبتو فينا الشعب انذلّ
بلعبة من تحت الطاولة
وانتو الدود بقلب الخلّ
وما في منكم شخص نضيف
___________
الشعب اللبناني مسروق
 ما عندو شَغلة وعَملة
وتايسحب مالو محروق
وبالمصرف ما في عملة
وضع الأزمة مش مسبوق
وكيف العالم محتملة
الشارع فاضي وما في سوق
والليرة بآخر تصنيف .
                             أنطوان إدمون أبوجوده

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق