عقم الدولة

ترشيد الدعم الموعود
واصل عالدرب المسدود
 وياريت منعمل ترشيد
وما بيبقى الفاشل موجود
_______
استقبلنا كلّ الزوّار
وما قدرنا نحلّ الأزمة
وبالمصرف زادو الأخطار
عالعملة بعزّ النقمة
لعبو عالشاشة الأدوار
وبالحلّ السحري الوهمي
ول Hair cut المخفي صار
والنقد الأخضر مفقود
_______
عقم الدولة من حكّام
ما كانو عاقدّ الظرف
وكل حاكم عالكرسي عام
بيغرف مال الدولة غرف
وبيحكمنا بالإعدام
كل ما بيرفع سعر الصرف
بيمشي وبيزرع  ألغام
كلما عالسلطة بيعود
_______
رجعنا نسمع وين ما كان
 بجولاتو المكوكيّة
وبين سعوديّة وإيران
حكومتنا إقليمية !
ما منخاف من الطوفان
أو ضربة شيطانيّة
خفنا ومنخاف بلبنان
حُبّ الذات الأعمى يسود
_______
منوقع كلّ مرة بحيرة
ومامنوضع سدّ وفاصل
ومش بالبسمة بتكشيرة
منبكي عالدعم الحاصل
وجيل الناطر تأشيرة
عالأسوأ يمكن واصل
مندعم لبناني بليرة
وميّة مندعم خلف حدود
_______
بين التكليف وتصريف
الأعمال اللبناني ضاع
وصرنا نخربط بالتعريف
بين القائد والأتباع
ومصرفنا تجوف تجويف
ومن مخزون العملة جاع
وريّاض بيعمل توصيف
بيشرح وبيحكي وبيجود
_______
نسينا كيف علم القانون
تشرّع مع مجلس نوّاب
بين الظاهر والمضمون
عالتنفيذ بيظهر خاب
بكل جلسة حفلة وجنون
بين الريّس والأقطاب
وعمرو هالمجلس ما يكون
ولا يشرّع ويسنّ بنود .
أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق