وطن الأزمات لبنان

 

وطن الأزمات لبنان

عاش الوطن بالحرب والأزمات

أكتر ماعاش السلم والقانون

وتعَطّلو مشاريعنا بجولات

 عنف وكلام وعقل مش موزون

وتفركشو أعمالنا بغايات

وأحلام شخصيّة وطمع مجنون

وتبدلو أحوالنا  بضربات

كان فيها شعبنا مطعون

وأخبار تتسرب وتشكيلات

وفلان حدّ فلان ما بيكون

منزغر بدل ما نكبّر العقلات

وصار الهبَل عنّا فنون فنون

يا رايحين تألّفو جوقات

صنع النميمة عا وتر مشحون

رحتو اخترعتو الشتم ومسبّات

وأجواء بشعة والوضع محقون

وكل يوم بطّيرو بطيّارات

من مال شعب مقهقر ومديون

ورحتو عطيتو كتير تلزيمات

بالسمسرة ومن دون رفّ جفون

وعِنّا المريض بدون أسعافات

ولا أدوية تخلي عذابو يهون

وعِنّا اليتيم بيزرف الدمعات

وتحت خط الفقر أو ما دون

وأنتو التهيتو بربح توظيفات

وعن مجد عم تحكو وعهد ميمون

وللكورونا نشوف عدادات

من دون خطة شعبنا بتصون

ولا ترامب أو بايدين نفع بالذات

مين ما ربح شو هم مين بيكون

أزماتنا ما بتنتهي بكلمات

ومع هيك نهج الوضع مش مأمون

واحد بيعطي الشعب تطمنيات

متل لكأنو صار نابليون

واحد بيلغي أصل تشريعات

وحامل على ضهر الكرامة زبون

نحنا ابتلينا بهالوطن بالذات

بحكم وسياسي طامع وملعون

وصرنا لصورة غيرنا مرايات

لا منتعب من الفقر أو من هم

ولا من وطن كلّو وطن مرهون

   أنطوان إدمون أبوجوده

مقالات ذات صلة

زر الذهاب إلى الأعلى