” لا تصريف ولا أعمال ” 

دولتنا دولة إهمال
وسوء التدبير عمومي
لا تصريف ولا أعمال
ولا تشكيل ولا حكومة
     ——-
كلفتو من مدّة سعد
ويا ما شالله عالتكليف
ما منصدق منكم وعد
من أعمال ومن تصريف
ما منحلم نحنا بالسعد
وأنتو توظفتو توظيف
حتى ما تتشكل  بعد
حكومة سعد المشؤومي
     ——–
عداد الكورونا زاد
وكل يوم بيصدر جدول
وصرنا عابواب الأعياد
والنحس علينا طَوّل
واللبناني الهيئة اعتاد
بالقهر يكون الأوَّل
وما يحاسب حكّام بلاد
ويرضى بحالة مأزومي
       ——-
عالناس عملتو أبطال
ورميتو علينا التهمة
وما فهمنا مرة شو قال
بخطة لعاملها فهمي
معرقلنا بكل الأشغال
وأنجاز بيصنع وهمي
نحنا ما في عنّا رجال
عنّا سلطة  موهومي
      ——–
هربو من السجن مساجين
وأنتو ظلمتو كلّ الناس
وكيف قدرو هربو السبعين
واحد من بين الحرّاس
نحنا مش ضد قوانين
لكن في عنّا إحساس
المجرم لازم نحنا ندين
ونخلي النّاس المتهومي .
أنطوان إدمون أبو جوده 

مقالات ذات صلة

زر الذهاب إلى الأعلى