ما في تيّار ولا سعد‎

مستقبل لبنان نهار
وما شفنا سعد ولا نهار
وصار الشارع كلّو عتم
وبالطاقة ما في تيّار
__________
أزمتنا أزمة حكّام
منتفعين ومسؤولين
وبكرا بيزيد الإجرام
كلما زادو الجوعانين
بالماليّة في أرقام
موضوعين ومنفوخين
وجبران لعندو أحلام
يرجع يجلس ست سنين
ويعمّر قصر الاوهام
ويصادر كلّ الادوار
__________
كلما بدنا نعبّي فيول
منركض عا مجلس نواب
وليل العتمة صار يطول
بمجلس شرّع شرع الغاب
وبالأزمة مين المسؤول
ما عرفنا وعن شعبو غاب
وبيبقى الجاني مجهول
ونحنا منبقى المقهورين
__________
 ما في نايب صوت حرّ
 وبيبقى بوضعو قنعان
وبيتلقى كلمة سرّ
تا يصوّت بالبرلمان
وبالجلسة دغري بيقرّ
مشروع مصدّق كنعان
ومتل السابق بدّو يمرّ
بحجة تأمين التيّار
__________
سعد تكلّف من كم شهر
وصرنا دولة بلا حكومة
وبرّي جالس صرلو دهر
يألف نكتة مهضومة
وشعب بلادي بيبكي نهر
وناطر سلعة مدعومة
ومعوّد صاير عالقهر
وكيف بدّو يراضي الاشرار
__________
بيعجبني كتر التنظير
كلما بتحكينا القوات
وبتتفلسف بالتعبير
وكيف بدها تخوض الجولات
وبالإعلام بتحكي كتير
وكيف فيها عملو نكايات
 لأ ماصار  ولأ بصير
وبكل مرة في أعذار
__________
وبالتغريدة مش مهضوم
ولا سياسي عنّا عن جد
بيبقى صوتو متل البوم
وبيحكي عن حلم الغد
يا ويلي ويا عيب الشوم
وين وصلنا بجزر ومدّ
ولبناني  عايش محروم
بين السلطة والتجّار
أنطوان إدمون أبوجوده 

مقالات ذات صلة

زر الذهاب إلى الأعلى