مش صورة تذكاريّة!‎‎

من حكومة ميقاتيّة
بدولة صارت مِهريّة
لازم نتذكر أعمال
مش صورة تذكارية
_____________
شكلّتو تلات تمانات
ونطرنا ١٣ شهر
ومش أزمة عملتو أزمات
وعشنا عيشة ذلّ وقهر
وجبتو عابلادي الويلات
ولعبتو فينا بالزهر
وقيّستو السلطة قياسات
عالأجسام المِجويّة
_____________
ما شلّتو الزير من البير
لمّا شكلّتو حكومة
وعا بعبدا عملّتو مشاوير
يا أركان المنظومة
بكل خطة فيها تزوير
وتركيبة مش مفهومة
بالتشكيل وبالتوّزير
وبالبسمة الصفراويّة
_____________
ضيعنا حقوق الإنسان
وصرنا نعيش بدون حقوق
والطفل بيخلق جوعان
ومن أكلو مقطوع السوق
والحاكم إبنو شبعان
وغير الطَيّب ما بيدوق
وعامل مزرعتو لبنان
بأطماعو السوداويّة
_____________
وضع اللبناني مأزوم
مش بالو بالتصريحات
بيغفى عالفقر وبيقوم
يا تجّار الدولارات
من حقّو ومالو محروم
وزعبرتو بالتوظيفات
وكل واحد فيكم متهوم
بتحويلاتو الشخصيّة
_____________
شفنا حكومة فيها وجوه
جديدة انشالله بتتوفّق
مسؤول الدولة المكروه
بالماضي يا ما خَفّق
وعن حقّ العالم بيتوه
وعاحسابو الرزقة دفّق
بيبقى مش صافي ومشبوه
بالأفعال الجرميّة
_____________
عملتو أزمة محروقات
تاتغلو سعر البنزين
بيكفي نوقف عامحطات
وأنتو تعبّو مرتاحين
أزمتنا أزمة نيّات
يا حضرات المسؤولين
وكل مدّة بتحكو بثروات
وصرنا دولة نفطيّة !
أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق