مصيبة تلقيح النوّاب‎

في نوّاب ومسؤولين
عابلادي جابو مصايب
والشيخ لفوق تمانين
بيتلقّح قبلو النايب
_________
الجسم بدولتنا منهار
يا تعتيرو  ويا دلّو
حكّام الأمة فجّار
تجّار وما بيحلّو
وبالدوّلة بنيو أوكار
أشرار وما بيملّو
مش أطهار ولا أحرار
وحقّ اللبناني سايب
_________
يا نوّاب المحظوظين
ليش تلقحتو بالزور
سرقتو دور المنتظرين
من دون شورى ولا دستور
أنتو مجانين ملاعين
وقّحين ومليانين فجور
ولا بيقبل شرع ولا دين
نكفي بهالوضع العايب
_________
هدّيتو علينا بيروت
ونزلو عالناس الحيطان
وأفضل كنّا نحنا نموت
ولا نشوف المرفأ خربان
شبابيك انهارت وبيوت
وببلادو انهان الإنسان
وحتى يأمّن خبز وقوت
بيرجع عابيتو خايب
_________
طرابلسي وعانى من الجوع
ودولتنا مش مسؤولي
وما بتبحث أزغر موضوع
وحدّو بتوقف مسطولي
ثورة إنسان الموجوع
كيف ما كانت مقبولة
لو بيصرّخ لو بيفوع
قلبو من الحرقة دايب
_________
جايي الإعصار وشي نهار
كيف وصلتو بتروحو
جيتو وسخّرتو الأقدار
وللشعب أخدتو روحو
نحنا بموطنّا أنصار
 ومنداوي كلّ جروحو
وأزغر شبّ من الثوار
أصدق من نايب شايب .
أنطوان إدمون أبو جوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق