ملوك التعطيل‎‎

يا حكومتنا معطوبي
خلقتي علينا محسوبي
عمرِك كان تلات جلسات
لما دخلّتي بغيبوبة

_____________

عمر اللبناني بالقهر
لا عمرو  شهر وشهرين
صرلو يعاني معكم دَهر
ومصيبتنا بجناحين
دموع الفقر بتكّرج نَهر
وإنتو غِنيتو بغفلة عين
بإجرة يوم معاش الشهر
وكلّ العالم منكوبي

_____________

شكّلنا حكومة وياريت
لا حكومة عنّا ولا حكم
ولا نوّاب ومجلس ميت
ناطر موعد دفن الجسم
منّكم واحد ما حبيّت
إنتو الصمّ وإنتو البكم
ولقمة خبز بقلب البيت
مش موجودة ومنهوبي

_____________

تحقيق المرفأ وين صار
وبالمصرف وين التدقيق
وكلّ يوم بيطلع إخبار
فارغ وبيحصل تحقيق
والدولار بلحظة طار
وعامل بجنونو تحليق
وانتو بتعطونا أفكار
بغش لفيكم معيوبي

_____________

وين الدولة والقانون
وين رموز الشرعيّة
مين بدو بدولتنا يصون
نزعة سلطة جنونيّة
علينا فوق ديون ديون
وكل البنيّة مهريّة
والحاكم وحدو ممنون
وعايش وهم الأكذوبة

_____________

يا ميقاتي بجرأة قول
الكلمة بظل التفّليسة
ما بيكفي بطيّارة تجول
وتزور  بمصر السيسي
الواقع ببلادي مجهول
الحلّ الآتي إبليسي
تفضل جيب وحطّ حلول
لكانت عَنّا محجوبة

_____________

وإنتو يا ملوك التعطيل
عملتو الحجّة بالبيطار
غنيّتو النصر مواويل
وعملّتو جيوش وأنصار
حملّتو الأزمة تحميل
للمحتجّ وللثوّار
ولعبتو  سياسة تمثيل
بالأدوار المطلوبة

أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق