من جيوب الناس‎

في عجز ومش عم نوفي
حكاية سرقة موصوفة
ليرة وليرة جيوب الناس
بإيد الدولة منتوفة
———
باريس الأول وتنين
المال تخصّصّ للإعمار
وزادو الدَين بغفلة عين
ومليار يجرّ المليار
تحت الطاولة في حسابَين
وسمسار يفاوض سمسار
ونحنا علينا خدمة دَين
حساب الدولة المكشوفة
 ———
مسؤول لبعدو فلتان
حدّو بيحطّ محاسيب
علينا تقشف وين ماكان
والثروة صوبو بيجيب
كل مرة بيسرق لبنان
وبيهرّب مالو وبيغيب
جولة بيعمل عالبلدان
وأفكارو مش مألوفة
 ———-
تحقيق المرفأ بيطول
ولازم بالعدل يكفّي
ويسحب كل حاكم مسؤول
 وكلن واحد ما يقفّي
شو صاير فينا معقول
حسابات البشعة نصفّي
ويمكن ما نبقى وتزول
 فينا الدولة المعروفة
——-
القاضي في كل الأحوال
صوتو مش صوت الحاكم
بيراقب سير الأعمال
وبالعدل العادل حاكم
ولما يشوف البعض احتال
والهدر الحاصل صادم
مش لازم عن صون المال
تبقي إيدو مكتوفة
———-
تفضل يا فادي صوّان
يا قاضي عَنّا مفوَّض
حكم الحاكم في لبنان
صار لازملو يتروَّض
رزق العالم مش منصان
ولا علينا بمال تعوَّض
وكل خطّة فيها عمران
 بتاني خطّة منسوفة
  أنطوان إدمون أبوجوده 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق