موت وحرمان‎

تبهدل ببلادي الإنسان

من القهر وكتر الحرمان

ونحنا ما منضحك منموت

من مزح الحكم بلبنان

  —-      —-

 

مسؤول بلادي ميسور

وبيهرّبها أموالو

وبيطلع من فكرو شرور

 حتى يزبّط أحوالو

ومش مهضوم ولا مشكور

وبالسرقة جاب غلالو

وبصوتو العالي في فجور

وبمال الدولة طمعان

  —-      —-

 

جددتو أمر التسكير

وقلتو للرزقه غيبي

وساحة ما فيها نواطير

والمسؤول بلا طيبة

نحنا منغرق بالتعتير

ولما منعلق بمصيبة

بيسكر  خطو وبيصير

 من خدمة أهلو هربان

  —-      —-

 

حكومة ما عنّا والغرب

مش بالو والله فينا

سافرتو و عملتو سرب

بطيّارات وما شفينا

والعالم عانص الدرب

بتموت ونحنا بقينا

نعدّ الموتى ومتل الحرب

صار اللبناني قرفان

  —-      —-

 

يا حكّام المغرورين

روحو عالبيت ارتاحو

أو عا سجن المحكومين

لو هَبّ العدل رياحو

حكمتو الناس المقهورين

وأصوات المرضى ناحو

بالمستشفى تعبانين

وكل واحد فيكن سلطان

  —-      —-

 

نحنا معكم متجّهين

عاجهنم مش عالجنّة

وصرنا زيادة تعبانين

والعنّة بضهر العنّة

حلّو عن شعبي المسكين

وعن ضهر الدولة وعنّي

تسكرّ بالحيّ دكاكين

وبالحكم فتحتو دكان

 

   أنطوان إدمون أبوجوده

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق