نحنا عِمّال الورشِه

 

نحنا عِمّال الورشِه

ورشِتنا بتطلُب مَجهود

دَرب النّضال مْنِمْشي

سَوا للحَقيقَه شْهُود

 

 

النَّضافِه والنَّزاهَه

مِن صِفات لُي بيخدُم

مْنقرَف مِن هالتَّفاهَه

مْنِ الحَقاره لُي بتُصدُم!

 

 

يا ربِّ عطِينا القِدرَه

تَ نصير للوِحدِه رَزمه

مِنْصَلّيلِك يا عَدرا

تا تنجّينا مْنِ الأزمِه!

 

 

النّخبِه بْعَهْد الإنتخاب

لازم تحصَل عَ الكِرسي

من النّواب أمَلنا خاب

الحكايِه: جَزرَه وْ.. مَرسِه!

 

 

بَدنا يِتجلَّس هَالتِّلم

لهلَّق بعدو أعْوَج

ولاد الثقافِه والعِلم

قِرفو مْنِ سْياسِة أهْوَج!

 

 

بَدَّك كرسي وْرَح بِتمُوت

فِضيُو جيابَك يا معتَّر

زغير وْ بدَّك تعمِل حُوت

يا مْعتَّر روح تْسَتَّر!

 

 

واقف تحت عيون الشمس

ومش شايِف كيف عَم بيبوخ

ما بيصرُخ عَم يهْمُس هَمْس

عَم يِدبل يِلوي ويسوخ!

 

 

 عَم قُول الحَقيقه جَهر

وما أصعَب هالحَقيقه!

بتبقى السِّنه تنَعشَر شَهر

السّاعَه ستّين دقيقه

 

 

يا ناخِخ إنتَ المِسمار

بِصليب الكَرامِه

لبنان مِش طاولة قمار!

وشو بتنفَع النَّدامِه؟!

 

 

قلبي بيسْكَر من خَمره

عمرا سِت آلاف سِنه

الفكرَه لُي بْراسي جَمره

بأفكاري عَم بِعتِني

سيمون حبيب صفير

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق