نوّاب عالحساب‎‎

يا مرشّح عالمجلس جيت
أسمَك أحمد أو حنّا
خايف من بعد التصويت
نرجَع أتعس ما كنّا
___________
لا تيّار ولا قوّات
قدرو يصونو الحريّة
قضيّتو الوقت مسبّات
عالشاشات المرئيّة
عملتو بالبعض نكايات
ربحتو وخسرتو سويّة
استأجرتو كلّ الشاشات
وما كنتو تحلّو عنّا
___________
قسمو الجبنة الشيعة تنين
بين الحَرَكة وحزب الله
وخرق الثورة بشي صوتين
تخويفن رعد تولّى
برّي باقي عالحالين
حتى يفرجها الله
أكتر من جيل وجيلين
بخيرات الدولة تهنّى
___________
طوني فرنجيّة بالخطّ
بيّو ماسكلو إيدو
بينزل عالسطر  وما خطّ
غير اللوم بتغريدو
عرفنا كلّ سياسة وخطّ
وما قشعنا بعد جديدو
خايف يطلع فرخ البَطّ
مش عوّام ويتدنّى
___________
عملو المجلس بيت بيوت
ولعبّو بالساحة الأولاد
ولمّا إبن البكر يفوت
بيعزم تيفوتو الأحفاد
الحاصل حاصل وبيروت
المطلوب يجيبو أعداد
هنّي يعيشو ونحنا نموت
تحت الردم بموطنّا
___________
بالشوف تحاربتو صفوف
وتحالفتو عالفاضي
ونايب من بيّو معروف
عايش عا مجد الماضي
بيستصعب تركيب حروف
لا زعلان ولا راضي
وكان بدّو الكرسي ما يشوف
ولا بأجدادو  يتكنّى
___________
يا خسران الجولة كنت
أربحلَك تبقى بالبيت
بعد النكسة بكيت حزنت
وأخصامَك قمت وسبّيت
لو أفعال الماضي زنت
وأرقام الشارع عَدّيت
 ما كنت ترشّحت وإنت
عارف كفّك شو جَنّى
___________
وإنتو يا نوّاب اليوم
لي ربحتو بإسم الثورة
عليكم رح منحطّ اللّوم
ان ما حاربتو كلّ عَورة
خسرنا مع عشّاق النوم
المطلوب تفورو  فورة
وما تصيرو متلن يا قوم
 ونبقى نحكي ونتمنّى.

أنطوان إدمون أبو جوده 

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق