وحوش السلطة‎

ببلادي عنّا إيمان
وما بيتغيّر إيماني
ما بيرجع يبني لبنان
غير الشعب اللبناني
___________
بمزرعة الحكّام وحوش
فلتاني ومش مسؤولي
بتبني بين الردم عروش
بجسم الدولة المسلولة
وحوش المال العام تحوش
معروفة ومش مجهولة
بدولار الأزمة بتفوش
فوق الناس الجوعاني
___________
ما بيرحم قلب المسؤول
لا بيتوب ولا بيشبَع
وعادروب السلطة بيجول
وبجنّة حكم بيربَع
ومن حلم الناس المقتول
صورة عالحيط بيطبَع
لا مقبول ولا معقول
 أوّل يبقى أو تاني ..
___________
بنينا بالماضي أمجاد
وما بقيت غير الذكرى
ولا مسؤول عليها زاد
بلمعة جديدة أو فكره
نسينا شو عطيو الأجداد
ومش واضح عنّا البكرا
ان كنّا نحنا   قراب بعاد
وما قدرنا نقاضى الجاني
___________
كل فرد وعندو مطاليب
معروفة أو مقموعة
بيحرق عالدرب دواليب
وبيجعلها مقطوعة
بيكفينا حكّام نجيب
وترجع ذات المجموعة
بالترغيب وبالترهيب
تحكم والشعب يعاني
___________
الخلطة مش خلطة حكّام
مش منظومة مخفوقة
نحنا قضينا عالأحلام
بجنّة صارت محروقة
في حاكم عالكرسي نام
السلطة منّو مسروقة
وحاكم عام  بمال العام
وشو بيطَلّع برّاني
___________
حكومة سعد ان طالت بعد
الأفضل لو ما بتتشكَّل
وصعبة منها نشوف السعد
وجبران العقدة بَكّل
وصوت الحزب بيرعد رعد
ونحنا كيف منتوكَّل
عا مشروع بيظهر بعد
 من سعودي أو إيراني
___________
أنطوان إدمون أبوجوده 

مقالات ذات صلة

زر الذهاب إلى الأعلى