أزمة حكّام وأعياد
كل عام الأزمة بتنعاد
وما لقيتو حسن التدبير
كيف بدنا نعيش الأعياد
ودمّرتو الدولة تدمير
_____________
كانو اسمالله متفقين
لكن عا صنع الصفقات
وهلق رجعو مختلفين
بين عطيني وخود وهات
ومصرف لبنان من سنين
مغرّقنا بالتطمينات
وحاكم بين الصرّافين
يوميّة بيخلق تبرير
_____________
ليرتنا قبال الدولار
صارت بالبنك منصّة
لحظة ولحظة عم تنهار
وبقلب الناس الغصّة
مصرفنا متل السمسار
بكل صفقة عندو حصة
وكل مدّة بيعمل إصدار
وبيطبع أوراق كتير
_____________
البنك الدولي ما بيعطيك
عالفاضي يا حاكم قرض
إنت بهدر المال شريك
وموجود بكل طرح وعرض
عامل فوق الأزمة ديك
وبتتمايل طول وعرض
ومنظومة سلطة بتحميك
ومنّك بتخاف التشهير
_____________
يا حكومة ميقاتي ليش
خلقتي وعشتي بغيبوبة
أركان السلطة بالطيش
عملو الدولة مسلوبة
صار عنّا من العالم جيش
بعمق الأزمة منكوبة
بأضرب حالة وأدنى عيش
وصرنا بالفقر مشاهير
_____________
ما تحرك مجلس نواب
بالسلطة الدستورية
يفتش ويعالج أسباب
الأزمات اللبنانية
أو مرة يحاسب أقطاب
بأحكامو التشريعية
يلاقي الحلّ ويفتح باب
ويغيّر مجرى التفكير
_____________
صرنا كتلة من الأزمات
وتعطيل يلاقي تعطيل
منتلقّى نحنا الضربات
وما قدرنا ولا شخص نشيل
عملو بالبعض نكايات
والمردود علينا تقيل
بالأهداف وبالغايات
بالأطماع وبالتزوير
أنطوان إدمون أبوجوده
