أصعب أوقات
شهدنا كتير من الأزمات
ومن ويلات وتفجيرات
وما بيكفي شو لقينا حروق
صار في أزمة محروقات
_______________
من الأموال المحجوزين
بالليرة أو بالدولار
ومن تجّار ومحتكرين
اللبناني صاير محتار
ومن شِحّ وجود البنزين
أو لمّا غلّو الأسعار
صرنا نوقف منتظرين
مش ساعة يمكن ساعات
_______________
يا حكومة حسّان دياب
تفرجتو علينا بالذل
تخبيّتو وسكرّتو الباب
وما فينا الأعمال نشلّ
واللبناني قلبو داب
وأنتو ما سألتو عالكلّ
وسعد بيرجع بعد غياب
بيبكي وبيعيد الكلمات
_______________
تحكمّتو بالناس كتير
يا أركان المنظومة
دولتنا بدها تطهير
من الأشخاص المشؤومة
لا تشكيل ولا توزير
أنتو مش خرج حكومة
تعلمتو فنون التزوير
بالجوهر والشكليّات
_______________
دفعتو أموال وتحويل
للمحكمة الدوليّة
وما قدرنا الأطفال نعيل
بالأحياء الشعبيّة
عملتو ترهيب وتهويل
وحفلة موت جنونيّة
وجهّلتو المجرم تجهيل
بالتحقيق وبالغايات
_______________
استنهاض الحل الموعود
بدّو سلطة موزونة
وما تفكرّ للحرب تعود
وتنسى اللعبة المجنونة
وعند الجيش وفوق جرود
بالمطبخ ما في مونة
وانتو علينا عرضتو زنود
لما استشهد شعبي ومات
_______________
نحنا تعبنا من التسيس
وطرقنا بواب الإيمان
وحكينا البابا فرنسيس
تا يساعدنا الفاتيكان
يا بابا أنت القدّيس
وشعب اللبناني تعبان
وما بيزول من قواميس
الحريّة بأصعب أوقات
أنطوان إدمون أبوجوده
