إمّي مَدرَسْةِ الإيمان!

إمّي مَدرَسْةِ الإيمان

مَشّتْنْي عا دَرب الرّب

بْفَيِّتْها  نْسِيتِ الحِرمان

بَركِتْها قَلْبِي تْشَرَّب !

مِن نغمِة دَقّة قَلبِك

دَقّة قَلبي يا إمِّي

بْقدِّس ذِكْرٍك وِبْحِبِّك

رُوحِي عا رُوحِك ضِمِّي !

ادعِي لِي يا إمِّي وْصَلِّي

وْمَلِّي مْنِ الرَّبِّ القُدّوس

بْمَسْبَحتِكْ كِنْتِ تَخَلِّي

النِّعمِه تْحِلّ تْنَجِّي نْفُوس !

إيدِي بإيدك يا إمّي

حتّى الضَّايع يِتبشَّر

بِمْحَبِّه وْنَخوِه وْهِمِّه

بْتِتْحَطِّمْ أصنامِ الشّر !

مْشِيتِ جِلْجِلْتِكْ قِلْتِ:

مَع آلامَكْ يا يَسوع !

عا قلْبِ الرّبِّ وْصِلْتِ

عرِفتِ أسْرارِ اليُنبُوع !

إمِّي المِتِّحدِه بِالآب

التِفْتِي فِِينا.. واحمِينا

رِدِّي الإلْفِه للأحباب

شَوْكِ الظِّلْم بْيِدمِينا !

بْعِطْرِ النِّعمِه تْعَطَّرتِ

حافَظتِ عا كَنز الرُّوح

وِبْرُوحِك ما خاطَرتِ

أفضالِك مِنِّك بِتفُوح !

بْصَمْتُ وْتِصمِيمُ وْتِسليم

مَع مَريَم عِشْتِ الإنجيل

تْعَلَّمتِ أقدَس تِعليم:

التَّوْبِه ما بْتِقبَلْ تأجيل !

بْنُورِ الرَّبِّ تْجلَّيتِ

يا إمّي وتْحَلَّيتِ

تْمسَّكتِ بْتَوْبِ العَدرا

تْواضَعتِ وِتْعالَيْتِ !

إمّي العَدرا القِدِّيسِه

مِنِّكْ لَمْسِه بْتِشْفِينا

عمِلْتِلِّكْ قَلْبِي كْنِيسِه

لَمِّ الشَّمْلِ بْيِكْفِينا !

سيمون حبيب صفير