الـ 2020 بالسَحبة طالعتلو!
الدولار بالسوق السودا طالع، الليرة برّا طالعة، أسعار المواد الغذائية طالعة، ريحة البنزين طالعة وسعر التنكة لاحقها طلوع، الأدوية عن الرفّ طالعة والمريض ضغطو طالع، الكهربا عن الخطوط طالعة وأصوات المولّدات وفواتيرها طالعة، عدّاد الكورونا طالع، روايح الزبالة طالعة، بيّاعين الحكي صوتهن طالع، التجّار مطلّعين والفجّار طالعين، الزعيم بالعلالي طالع، المسؤول عالكرسي طالع، السياسي عَ كتاف الناس طالع، المواطن عالدرَج طالع ولسانو لبرا طالع وخلقو طالع.. وحدو البلد نازل نزول ولاحقو سوء الطالع وما حدا من المهوار بيطلّعو، وبالنتيجة اللبناني آكلها عالنازل والطالع وسنة الـ 2020 بالسَحبة طالعتلو!
