المدعوم والمعدوم
لا في شغل ولا في مال
لا تشكيل ولا حكومة
والناس بأصعب أحوال
مش مدعومة معدومة
_________
بالسوبر ماركت في رفوف
فضيو والناس احتارو
بين السلعة والمصروف
والأرخص رجعو اختارو
ومن شغلو العامل مصروف
وأصحاب المال انهارو
بتوقف حدّ البنك صفوف
مش مرتاحة ومصدومة
_________
بتدفع دولتنا الدولار
حتى تصرف عالمدعوم
وتا تربِّح بعض التجّار
بتمضي وبتوقّع مرسوم
بين سطورو في أسرار
وبالكذب بتخفي المعلوم
وما نعرف شو صار ودار
وما منحصلّ عا معلومة
_________
يا تعتيرَك يا إنسان
كيف صرنا وكيف بدنا نصير
تخرّبط بالمال الميزان
ودولار بيعلى وبطير
صرنا من آخر بلدان
والحلم تكسّر تكسير
بريّاض ومصرف لبنان
بحكم وسلطة مشؤومة
_________
نحنا ما عنّا حكامّ
عالبنان و مسؤولين
وبالدولة كترو الأزلام
موجودين ومنتفعين
كل يوم منحجب إعلام
ومنكتب كلمات تهين
ومنعيش بخطة وأحلام
من أوهام المنظومة
_________
حطينا للفهم قياس
وممنوع نطبّق قانون
ومنزرع حولو الوسواس
لو عالقاضي ما منمون
والعدل بميزانو خاس
لو ما قدرنا نوفي ديون
وترجع كلّ حقوق الناس
المفقودة والمهضومة.
انطوان إدمون أبوجوده
