دموع الوطن‎‎

ما منعرف كيف بدنا نموت
 بتفجير ، بقصف ، بإعصار !
وعين بتبكي عا بيروت
وعين بتبكي عا عكّار
________________
عايش ببلادي محروق
ومقطوع من المحروقات
وبليل العتمة مخنوق
ومش باقي غير الشمعات
والمال العام المسروق
تهرّب عا كلّ الطرقات
وبصهريج الموت يسوق
وسمسار يلاقي سمسار
________________
ما بيتوقف وليم نون
لو طالب بالحريّات
خيّو بالمرفأ مدفون
استشهد وبقلبو ما مات
يا حاكمنا يا مجنون
لو توقف معنا بالذات
وبصفوف العالم بتكون
وبتعرف فينا شو صار
________________
يا عسكرنا مش معقول
تضربنا بقلب الساحات
وشايف موطنا مشلول
وما بتكفّي المعاشات
ما تحمي فاسد مسؤول
تعمشق عاضهر السلطات
وبسحر وساحر مجهول
صار بأزمتنا جبار
________________
بكينا يا عكّار اليوم
وشعلو بالقلب النيران
وكل  ساعة منبكي واللوم
كيف عشتي سنين الحرمان
أنتِ بقيتي الشعلة ودَوم
خزان الجيش بلبنان
عيونِك ما بتدوق النوم
وانتِ حكاية للثوار
________________
الله يشفي المحروقين
ويرحَم أرواح الأموات
نار وأهل المفقودين
من أزمة فاتو بأزمات
منولع مرة بالبنزين
ومرة بتفجير النيترات
مرتكبين ومعروفين
وممنوع نسمي الأشرار
________________
نحنا يا شعبي المسكين
ما منتجرجر  عامخافر
زلم السلطة شبعانين
وجوع لفينا مش كافر
الكافر حاكم صرلو سنين
ظالم وبنهجو سافر
ما بيرضي اللبنانيّين
وبيرضي نوّاب العار
أنطوان إدمون أبوجوده 

مقالات ذات صلة

زر الذهاب إلى الأعلى