صلِّي حتى السِّلِم يكون بلبنان وكلّ البلدان!
يا بابا لإسمك لاوون وعرشك عرش الفاتيكان
صلِّي حتى السِّلِم يكون بلبنان وكلّ البلدان
بطرُس صخرة عليها إنت واقف حَبْر وغُسْطيني
وكلمات بلاهوتك زِنِّت من روما وأعلى مدينة
بالدَّمعة بَكّيت وما حْزِنت وبالسّاحة حَمَلو الزِّينة
وعاشرفِة شَرَّفِت وكنت عاطي البَرَكة والإيمان
الدُّخَّان الأبيض بيطُلّ لمّا بيتّفِقوا الأحبار
إنت طلعت بإسم الكِلّ وفَرحاني فيك الأديار
كَرَّسْتنا بروما مِنْجَلّ وتاريخ تْمانِي أيّار
نِجم علينا ونورَك هَلّ من الله وربّ الأكوان
يا بابا من شْعوب الأرض في صَرختنا بتِسْمَعها
عم بتعاني بطول وعَرض وما بْيِنشَف مَدْمَعها
عَطّينا حتّى نصلِّي فَرْض تالفِتنة ما نِقشَعها
وتفْرِض عَكلّ حاكم فَرْض ما يعذِّب مرَّة إنسان
بدنا بْيُوت الناس تْصُون والسِّلِم الغالي يِرجَع
وكلّ واحد عقلُو مجْنُون ما يِرجَع يِمْسِك مَدْفَع
بدنا البابا علينا تْكُون وغيرَك ما إلنا مَرْجَع
بكركي وإنت ومار مارون وأرزتنا بتحمّو لبنان
أنطوان إدمون أبوجوده
