يا بطرَك صوتَك صارخ بالبرّيّه!

تِجّار الهيكل رَبّي بدُّن كرباح،

قوّي البطرَك تا عنّا المِحتلّ يحلّ

فواج بترحَل مِن عنّا وبتبطلّ فواج

يا ربّي ارحَمنا، ادعمنا.. عَم يقوى الذلّ!

___________________

 

كرمالِك يا هويّه مْنفدي لبنان

بفلذات الكبد، ونحنا مِنقدّم دَمّ.

لبنان إلنا، وشبابو هنّي ألحان

المجد، وهنّي اللّي بيبنُو يلّي تهدَّم!

___________________

 

يا هَالمَحَبِّه بِجسمِك نِحنا شْرايين!

يا فادينا نجّينا من فقر الرّوح،

من إعدا الحقّ احمينا، نحنا جايين

نتضرّع لَك يا ربّي بأسْرار نبوح.

___________________

 

كلمات بكركي بترعُد وبتبرُق برق،

بتشتّي علينا، بتروي الشعب العطشان.

بَطركنا لْ بإيمانو مْشعَشع عَ الشرق

وَحدو اللي قادر ينشُل شعبو الغِرقان!

___________________

 

إنت القايِد يا راعي، بإيدَك مِفتاح!

عَوْجا وْعَوْرا وْعَم تعرُج هالسّياسِه.

لبنان اللّي بْيبكُولو عيون التّمساح

جِسْمُو مجرّح، يا ربّي، من النّجاسِه!

___________________

 

بَيان بكركي غيّر مَجرى المشروع

كلمات الحقّ بتجرح إبن الباطل!

يا الله بلبنان أرزك بَعدو مزروع

لْ بَدّو يْغيّر عَلَمْنا حظّو عاطل!

___________________

 

للثورَه مْنبْقى النار وْهِنّي الشّحتار!

نِحنا ولاد الحقيقه السّماويّه.

مْنِتلاقى بالمَحبّه، هالشَّعب اختار

بِبكركي يِحمي حقوقو والقضيّه!

___________________

 

يا بطرَك صوتَك صارخ بالبرّيّه!

مِن صَرح بكركي بْتعلى صْوات الأحرار.

وحدُن الكبار بيسعوا للحريّه

زغار اللّي خانو بلادُن وبيبقو زغار!

سيمون حبيب صفير

مقالات ذات صلة

زر الذهاب إلى الأعلى