عالبلدية مختلفين وورا الكرسي راكضين!

عَ سطح البلدية هيي هيي الخبرية! مبارزة عَ الرئاسة والكرسي بسوق النخاسة! مين رح بيكون الريّس؟ والتنَين مين بدّو يهيّص؟! هيدا بيقول عن حالو كويّس هيداك بينعتو إنو رخيّص! واحد بالفلوس بيشتريك تاني بيدخّلك شريك! هيدا تاجر وبيبيعك هيداك بتعدّ وراه صبيعك! شي كذّاب شي سبّاب وتنايتن راكضين ورا المزراب! مرشّح بيطرق فرمانات مرشّح بيطلق شعارات مرشح شاطر بالبهورات ومرشّح شغلتو الكومبينات! الأول بالكرسي موعود والتاني شعارو الوعود! ريّس منخارو طويل وريّس بيطيّر فيل! جنابو معبّى الكيس حضرتو تلبيس! على بعضن رفعوا متاريس وكل مين تحالف مع إبليس! حلم بنومو الكرسي وقال اليوم عرسي! عزم كل الناخبين عَ أكلة لحم بعجين! بكرا بياكلهن لحمة وبيرجع يرميهن عضمة! مرشّح نزع من راسو الضمير وكبّو بكعب البير! مرشّح اشترى مواكب للتزمير ووعد يشيل الزير من البير! كلّن عالبلدية مختلفين وورا الكرسي راكضين! وآخر همّن المواطنين! اليوم عايزينن كناخبين ووزّعولن بونات بنزين! بكرا بيلبطوهن واللي بعدو بينسوهن! الصالح راح بعزا الطالح! وتصبحون على بلدية!

انطوان ابوجودة