بلد مقطوع‎

لبناني بموت وما بجوع
لا ترهيب ولا تطويع
لو صفّى كل شي مقطوع
نحن مش شعب مقاطيع
______________
كل أزمة فيها أزمات
بين الشاري والبايع
وبتمشي كلّ الصفقات
وحقّ اللبناني ضايع
دعمتونا وشرّ الغايات
بلقمتنا المُرّة فايع
في بنزين وفي محطّات
مفتوحة وما بدها تبيع !
______________
نحنا فشلنا وين ماكان
وما في خطّة مدروسة
وعلينا هدّو البنيان
وجوه الحكم المنحوسة
بهدلتو شموخ الإنسان
بالأفكار المهووسة
وشوّهتو الصورة بلبنان
وبالمشهد إنتو مصاريع
______________
كنّا من أحسن بلدان
والهمزة بين شرق وغرب
صار اللبناني فزعان
وكل مدّة بياكلها ضرب
مرة من أقرب جيران
لمّا علينا بتفتح حرب
ومرة من حرب العدوان
لكلّ همّو يعمل تطبيع
______________
شو رأيك يا حاكم أنت
يا عون ويا برّي وسعد
وشو عامل فينا ما ندمت
منكم مش جايي ولا سعد
عالكرسي لو وزنك زنت
ما بتحكم وبتبقى بعد
بتتنحّى لو مين ما كنت
ومن دون حفلة ولا توديع
______________
تحقيق المرفأ ما صار
وبعدو جاري ومش جاري
ومطرح صوّان البيطار
ومين بدّو الحق يداري
ما في عدل وبالأعذار
عملتو التحقيق عياري
وإسرار خفيتو  بأسرار
بين الكذبة والتمييع
______________
يا حكومة شغل الأشخاص
 كيف بدّك انت تكوني
بدل العام اخترتو الخاص
ودولة أكتر مديونة
نور العدل شحيح  وناص
وأحكامو مش موزونة
وما عرفتو تعيشو بإخلاص
وشرّعتو السرقة تشريع
                 أنطوان إدمون أبوجوده 

مقالات ذات صلة

زر الذهاب إلى الأعلى