الحاصل واصل!
الأحزاب التقليديّة
والسلطة اللبنانيّة
بيتفقو عا شو ما كان
ضد الثورة الشعبيّة
_____________
أعلنتو بسرعة الترشيح
وما تركتو أدنى فاصل
بين فاسد أو بين منيح
المطلوب تلاقو حاصل
وكل نايب همّو ما يزيح
عالندوة يكون الواصل
بمجلس نوّاب التشبيح
وغلطاتو التشريعيّة
_____________
كنتو بالساحة أخصام
وتلاقيتو بغفلة عين
نسيتو تاريخ الإجرام
وتفجير المرفأ والدين
ولوحات تبيع الأوهام
حمرا وصفرا عالميلين
وصورة عالسطح وأزلام
بتستفقدها يوميّة
_____________
هدّيتو سعر الدولار
حتى الإستحقاق يمرّ
والشعب الصابر محتار
منكم دايق طعم المرّ
بتحكو عن طيش الثوار
وإنتو نشرتو الرأي الحرّ
زهقتونا بالأفكار
والاّلفاظ المهريّة
_____________
بتزورو بكركي والدار
والمجلس وبيوت الخير
وبتدورو داير من دار
حول كنيسة وجنب الدير
وعالدرب قشعنا أنصار
وحتى تمرّو قطعتو السير
تزورو وتحكو ليل نهار
الجمعيّات الخيريّة
_____________
يا دافع حقّ الاصوات
وبالمجلس شاري مقعد
بتنسينا بكل الأوقات
لمّا عالكرسي بتصعد
بتقرب إلنا بالجولات
وبترجع إنت الأبعد
بتتركنا وقت الأزمات
بالرحلات الجوّية
_____________
يا شعبي اللبناني فيق
وما تصدِّق إلّا حالك
كيف بدنا المنظومة نطيق
وبتهرّب مالي ومالك
بكل مدّة بتعمل تشويق
وبتحكي الكذب قبالك
لا تحقيق ولا تدقيق
وأزمتنا هيّي هيّي
